ពិធីក្រុងពលីសុំម្ចាស់ទឹកម្ចាស់ដីដើម្បីសាងសង់ស្ពានថ្មថ្មី


ខេត្តសៀមរាប ៖ នៅចុងសប្តាហ៍នារសៀលថ្ងៃទី ១៨ ខែកញ្ញា ឆ្នាំ២០១៦មិ្សលមិញនេះ  ឯកឧត្តមទេសរដ្ឋមន្ត្រី ស៊ុន  ចាន់ថុល រដ្ឋ​មន្ត្រីក្រសួងសាធារណការ​និង ដឹកជញ្ជូន  ឯកឧត្តមបណ្ឌិត ឃឹម ប៊ុនសុង  ​អភិបាលនៃគណៈអភិបាលខេត្ត ឯ.ឧ នូ ផល្លា ប្រធាន​ក្រុម​ប្រឹក្សាខេត្ត និង ឯកឧត្តម លោកជំទាវ ជារដ្ឋលេខាធិការ គណៈអភិបាលខេត្ត សមាជិកក្រុមប្រឹក្សាខេត្ត អស់លោក លោកស្រី​ជា​ថ្នាក់ដឹកនាំមន្ទីរ មន្ត្រីរាជការជុំវិញខេត្ត បានអញ្ជើញចូលរួម ក្នុងពិធីក្រុងពាលី ដើមី្បសុំនូវសេចក្តីសុខសប្បាយ ពីម្ចាស់ទឹក​ម្ចាស់ដី និង បារមី អ្នកគង់ប្រថាប់ថែរក្សាការពារ នៅលើទឹកដីប្រវត្តិសាស្ត្រសៀមរាប  ក្នុងការសុំការសាងសង់ស្ពានថ្មថ្មី ចំនួនពីរ ឆ្លងកាត់​ស្ទឹងប្រវត្តិសាស្ត្រសៀមរាប ដែលនឹងធ្វើការ បើកការដ្ឋានសាងសង់នៅព្រឹកថ្ងៃទី ១៩ កញ្ញា នេះផងដែរ ។

បន្ទាប់ពីឯកឧត្តមទេសរដ្ឋមន្ត្រី និង ឯកឧត្តមបណ្ឌិតអភិបាលខេត្ត ធ្វើការបូជាទៀន ធូក និង ថ្វាយផ្កាភ្ញីនៅរានអស្នាក់រួចមក ក្នុង​ពិធី​បួងសួងក្រុងពាលីនេះ បានប្រព្រឹត្តធ្វើទៅតាមគន្លងប្រពៃណី ទំនៀមទម្លាប់នៃ ព្រះពុទ្ធសាសនា ព្រះសម្មាសាម្ពុទ្ធ ព្រះបរមគ្រូនៃ​យើងដែលបានគោរពបដិបត្តិតរៀងមក ។ ក្នុងនោះដែរឯកឧត្តមទេសរដ្ឋមន្ត្រី និង ឯកឧត្តម លោកជំទាវ និង អស់លោក លោកស្រី  លោកអាចារ្យក៏បានធ្វើពិធីឧទ្ទិសបួងសួង សូមនូវព្រះបារមីដ៏ស័ក្តសិទ្ធិ ដែលគង់ប្រថាប់ថែរក្សានៅលើទឹកដីប្រវត្តិសាស្ត្រ អង្គរ​ដ៏បវរនៃយើង ក៏ដូចនៅក្នុងកម្ពុជារដ្ឋទាំងមូល  ព្រមទាំងបារមីព្រះអង្គចេកព្រះអង្គចម លោកយាយទេព តាដំបងដែក លោកតារាជ ព្រះអង្គតូច ព្រះអង្គធំ គង់នៅខ្នងភ្នំគូលែន និង បារមីអរុក្ខអរក្សអ្នកតាគ្រប់ទិសទី និង ទេវតាគង់ថែរក្សានៅតាមប្រាង្គប្រាសាទនានា នៅលើទឹកដីដ៏ស័ក្តសិទ្ធិ តាមជួយថែរក្សានូវថ្នាក់ដឹកនាំប្រទេសកម្ពុជា ព្រមទាំងសូមជួយឲ្យកិច្ចដំណើរការនៃការ បើកការដ្ឋាន​សាងសង់ស្ពានថ្ម ទាំងពីរ ឲ្យបានដំណើរការទៅដោយសេចក្តីសុខចម្រើន ក្នុងផលប្រយោជន៍បម្រើដល់ សេដ្ឋកិច្ចជាតិ និង ប្រជាជនកម្ពុជាមានការរីកចម្រើន និង ជួបនូវតែសុខសន្តិភាព តទៅអនាគត ។

បន្តមកលោកតាអាចារ្យ ក៏បានធ្វើពិធីដង្ហែនូវគ្រឿងដង្វាយ ដើមី្បការឧទ្ទិសជូនដល់ព្រះធរណី ក្នុងការសុំទីកន្លែងសាងសង់ស្ពានថ្ម​ទាំងពីរ ដែលបានប្រព្រឹត្តធ្វើទៅតាម ក្បួនខ្នាតប្រពៃណីពីបុរាណ នា សម័យអង្គរ  ដែលប្រជាពុទ្ធបរិស័ទខ្មែរយើងនាពេលបច្ចុប្បន្ន បានបំភ្លេចចោលនោះ ត្រូវបានមន្ទីរវប្បធម៌ និង វិចិត្រសិល្បះខេត្តសៀមរាប សហការជាមួយលោកតាអាចារ្យ ធ្វើការរំលឹកឡើង​វិញ នៅក្នុងពិធីក្រុង ពាលីសាងសង់សំណង់ធំៗ ដែលពីបុរាណកាលបានប្រារព្ធ ហើយត្រូវបានធ្វើការស្រាវជ្រាវ តាមរយៈការ​សិក្សាធ្វើកំណាយ នៅតាមទីសំណង់បុរាណ សំខាន់នៅគល់ស្ពានបុរាណជាដើម ៕ អត្ថបទ​ ម៉ី សុខារិទ្ធ

116 117 118 119 120 121 122 123 128 129 130 131 132124