ខេត្តសៀមរាប ៖ ស្របពេលដែលរាជរដ្ឋាភិបាលកម្ពុជាមានការយកចិត្តទុកដាក់ជម្រុញឲ្យមានការទប់ស្កាត់ ការការពារ និងការបោសសំអាតអាវុធយុទ្ធភ័ណ្ឌមិនទាន់ផ្ទុះ បញ្ហាពិការភាពដែលកើតមានពីកំណើត ពីការចាក់ថ្នាំបង្ការផ្សេងៗក្នុងវ័យ កុមារ និង ពិការដោយសារសង្រ្គាម មានការថយចុះគួរឲ្យកត់សម្គាល់ ។ ប៉ុន្តែពិការភាព និង ស្លាប់បាត់បង់ជីវិត ដែលកើតឡើងដោយសារគ្រោះថ្នាក់ចរាចរណ៍នៅពេលប៉ុន្មានឆ្នាំចុងក្រោយនេះ មានការកើនឡើងគួរឲ្យព្រួយបារម្មណ៍ ។ នេះគឺជាការលើកឡើងរបស់លោក គឹម ឆៃហៀង អភិបាលរងខេត្តសៀមរាប ក្នុងវេទិកាផ្សព្វផ្សាយច្បាប់ ស្តីពីចរាចរណ៍ផ្លូវគោក ដែលបានប្រារព្ធធ្វើឡើងនៅក្នុងបរិវេណសាលាស្រុកពួក ខេត្តសៀមរាប នាព្រឹកថ្ងៃ១២ ខែធ្នូ ឆ្នាំ២០១៦ ដែលរៀបចំដោយក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច សហការជាមួយអាជ្ញាធរខេត្តសៀមរាប មានការចូលរួមពីគណៈអភិបាលស្រុក វាគ្មិនមកពីមន្ទីរអង្គភាព-ពាក់ព័ន្ធ ប្រជាពលរដ្ឋ និងសិស្សានុសិស្សបានចូលរួមផងដែរ។ ឯកឧត្តមអភិបាលរងខេត្ត ក៏បានសង្ងត់ធន់ថា ការមិនគោរពច្បាប់ដទៃទៀតគឹមិនបណ្តាលអោយយើងបាត់បងជីវិតនោះទេ តែបើមិនគោរពច្បាប់ចរាចរណ៍ នឹងបណ្តាលអោយយើងបាត់បង់ជីវិត។ លោក គឹម ឆៃហៀង អភិបាលរងខេត្តសៀមរាប បានថ្លែងថា វេទិកាវេទិកាផ្សព្វផ្សាយច្បាប់ស្តីពីចរាចរណ៍ផ្លូវគោក នេះ គឺផ្តោតការយកចិត្តទុកដាក់ចូលរួមអប់រំផ្សព្វផ្សាយឲ្យកាន់តែទូលំទូលាយទៅដល់ប្រជាពលរដ្ឋ ពិសេសយុវជន និងយុវនារី ដើម្បីឲ្យពួកគេគោរពច្បាប់ចរាចរណ៍ផ្លូវគោក ធានាសុវត្ថិភាពសណ្តាប់ធ្នាប់ ការពារអាយុជីវិត និងសុខភាព មនុស្ស សត្វ ទ្រព្យសម្បត្តិ និងបរិស្ថាន ។ ឯកឧត្តមបានថ្លែងបន្តថា បញ្ហាគ្រោះថ្នាក់ចរាចរណ៍ នៅក្នុងខេត្តក៏ដូចទូទាំងប្រទេសតែងតែកើតមានស្ទើររាល់ថ្ងៃ ដោយសារកត្តាមនុស្ស និង សម្ភារៈ។ ដូច្នេះយើងត្រូវតែធ្វើការផ្សព្វផ្សាយអប់រំ ក្នុងតំបន់គោលដៅដល់អ្នកប្រើប្រាស់ទោចក្រយានយន្ត រថយន្តឲ្យបង្កើនការប្រុងប្រយត្ន័ ពាក់មួកសុវត្ថិភាព ចូលរួមលើកកម្ពស់សិទ្ធិ និង លុបបំបាត់ភាពរើសអើងគ្រប់រូបភាព មកលើជនពិការ ដោយធ្វើយ៉ាងណាបង្កភាពងាយស្រួលសម្រាប់ជនពិការទៅទទួលសេវាសាធារណៈក្នុងសហគមន៍ ។ លោក គឹម ឆៃហៀង បានមានបញ្ជាក់ថា បើទោះជាពិការភាព និង ស្លាប់បាត់បងជីវិត ដោយសារគ្រោះថ្នាក់ចរាចរណ៍មានការកើនឡើងបន្តិចក្តី ក៏យើងបាននឹងកំពុងអនុវត្តអនុសាសន៍ ណែនាំពីប្រមុខរាជរដ្ឋាភិបាល «ថ្ងៃនេះថ្ងៃស្អែកកុំឲ្យមានគ្រោះថ្នាក់ចរាចរណ៍» និង ជម្រុញឲ្យមានការរឹតបណ្តឹងច្បាប់ចរាចរណ៍ផ្លូវគោក ព្រមទាំងអនុវត្តន៍នូវវិធានការក្តៅគគុកចំពោះជនបង្ករ ដែលបើកបរលើសល្បឿនកំណត់ ព្រមទាំងការបើកបរក្រោមឥទ្ធិពលគ្រឿងស្រវឹង ។ លើសពីនេះរាជរដ្ឋាភិបាលកម្ពុជា បានជម្រុញឲ្យអនុវត្តច្បាប់ការពារ និងលើកកម្ពស់សិទ្ធិជនពិការ និងយុទ្ធសាស្រ្ត ចតុកោណដំណាក់កាលទី៣លើវិស័យពិការភាពផងដែរ ៕ អត្ថបទ ម៉ី សុខារិទ្ធ
