ពិធីផ្ទេរភារកិច្ច និងប្រកាសតែងតាំងអភិបាលរងខេត្តសៀមរាប


ខេត្តសៀមរាប ៖ លោក ទៀ សីហា ឋានន្តរស័កិ្តឧត្តមមន្ត្រី ថ្នាក់លេខ៣  ដែលជានាយរងខុទ្ទកាល័យសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ត្រូវបានធ្វើការ​ប្រកាស​ចូលកាន់​តំណែង​ជា​អភិបាលរងខេត្តសៀមរាប កាលពីរសៀល​ថ្ងៃទី​១១ ខែ សីហា ឆ្នាំ​២០១៧ នៅរដ្ឋបាលសាលា​ខេត្តសៀមរាប  ជំនួសលោក គឹម ឆៃហៀង អភិបាលរងខេត្ត ត្រូវទៅបម្រើការងារនៅក្នុងក្របខ័ណ្ឌដើមវិញ ​។  ពិធីនេះបានប្រព្រឹត្តទៅក្រោម​អធិបតី ភាពរបស់ឯកឧត្តម លេង វី អនុរដ្ឋលេខាធិការក្រសួងមហាផ្ទៃ  តំណាងដ៏ខ្ពង់ខ្ពស់របស់សម្តេចក្រឡាហោម  ស ខេង ឧបនាយករដ្ឋមន្ត្រីរ​ដ្ឋ​មន្ត្រី​ក្រសួងមហាផ្ទៃ ​ ។ ​

បន្ទាប់ពីឯកឧត្តមបណ្ឌិត ឃឹម ប៊ុនសុង  អភិបាលនៃគណៈអភិបាលខេត្ត  ​បាន​ធ្វើកិច្ចស្វាគមន៍ និង ​ របាយការណ៍​ស្តី​ពី​សមិទ្ធផល​ដែល​បាន​កសាង ​និង ​អភិវឌ្ឍន៍ក្នុងខេត្ត ក្នុងការអនុវត្ត​​គោលនយោបាយ​កំណែ​ទម្រង់​ស៊ីជម្រៅ ដើម្បីសម្រេចឲ្យ​​បាននូវគោល​ដៅជាយុទ្ធសាស្ត្រ និង ការអភិវឌ្ឍសេដ្ឋកិច្ច សង្គម ប្រកបដោយ​ចីរភាព ជាសំខាន់ការដាក់ចេញនូវយុទ្ធសាស្ត្រចតុកោណដំណាក់កាលទី៣  ដើម្បីបន្តពង្រឹងនូវយន្តការនានារបស់រាជរដ្ឋាភិបាលកម្ពុជា ​ក្នុងនីតិកា​ល​​ថ្មីនេះ ដើម្បីកំណើនការ​ងា​រ សមធម៌ និងប្រសិទ្ធភាព ​ពិត​ប្រា​ក​ដ​នៅកម្ពុជា។ ដើម្បីធានាឲ្យគោលនយោបាយ និង យុទ្ធសាស្ត្រខាង​លើ​ទទួលបានជោគជ័យ អាជ្ញាធររដ្ឋបាលថ្នាក់ក្រោមជាតិ ក៏មាន​តួនាទីយ៉ាងសំខាន់ក្នុងការរួមចំណែកទទួល​ខុសត្រូវ​ក្នុងការ​អនុវត្ត​គោលនយោបាយកំណែទម្រង់​វិមជ្ឈការ និងវិសហមជ្ឈការរបស់​រាជរដ្ឋា​ភិបាល តាមរយៈច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ ច្បាប់ស្តីការគ្រប់គ្រងរដ្ឋបាលឃុំ សង្កាត់ បទបញ្ជា និ​ង លិខិតបទដ្ឋានគតិយុត្តនានាដែលនៅជាធរមាន។

បន្តមកលោក អ៊ុំ ចំរើន ​អនុប្រធាននាយកដ្ឋានបុគ្គលិក នៃអគ្គនាយកដ្ឋានរដ្ឋបាល នៃក្រសួងមហាផ្ទៃ បាន​អាននូវអនុក្រិត្យរបស់រាជរដ្ឋាភិបាលកម្ពុជា ស្តីពីផ្ទេរភារកិច្ច លោក គឹម ឆៃហៀង ឋានន្តរស័ក្តិវរមន្ត្រីថ្នាក់ លេខ១ នៃក្របខ័ណ្ឌមន្ត្រីគ្រប់គ្រងរដ្ឋបាល ទីស្តីការគណៈរដ្ឋមន្ត្រី ពីអភិបាលរងខេត្ត ឲ្យទៅបម្រើការងារនៅក្នុង ក្របខ័ណ្ឌដើមវិញ និង ​​ប្រកាសតែងតាំងលោក ទៀ សីហា ឋានន្តរស័កិ្តឧត្តមមន្ត្រី ថ្នាក់លេខ៣ ដែលជានាយរង ខុទ្ទកាល័យសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ត្រូវបានធ្វើការ​ប្រកាស​ចូលកាន់​តំណែង​ជា​អភិបាលរងខេត្តសៀមរាបជំនួស ។

បន្ទាប់ពីគណៈអធិបតីប្រគល់​អនុក្រឹត្យ​ ​ និង ការ​ប្តេជ្ញា​ចិត្តរបស់លោកអភិបាលរងខេត្តដែលទើប ទទួលបានការតែងតាំងថ្មីរួចមក  មានប្រសាសន៍សំណេះសំណាលនោះឯកឧត្តម លេង វី ក៏បានធ្វើការបញ្ជាក់ផងដែរថា តាមច្បាប់ក្រឹត្យក្រមរបស់មន្ត្រីរាជការគ្រប់រូប​ ដែលបានបម្រើការងារហើយបានគ្រប់អាយុ ​គឺ អភិបាលរងខេត្តត្រូវមានអាណត្តិកំណត់ និង ចូលនិវត្តន៍ មិនថាថ្នាក់ដឹកនាំ មន្ត្រី បុគ្គលិកឡើយ ។ ការប្រកាសចូលកាន់តំណែងជាអភិបាលរងខេត្តនេះ ក៏មានការជឿជាក់យ៉ាងច្បាស់ពីរាជរដ្ឋាភិបាល ក្រសួងមហាផ្ទៃ ចំពោះមន្ត្រី ថ្នាក់ដឹកនាំនៅរដ្ឋបាលថ្នាក់ក្រោមជាតិ ដែលជាការលើកទឹកចិត្តដល់មន្ត្រី ឲ្យបន្តខិតខំបំពេញភារកិច្ចក្នុងការបម្រើជាតិមាតុភូមិ ។ ឯ.ឧ លេង វី ក៏បានលើកផងដែរ អំពីការពង្រឹងនូវសមត្ថភាព និង គុណភាពនៃចំណេះដឹងដល់មន្ត្រីរាជការ ដោយធ្វើការបណ្តុះបណ្តាលផ្ទាល់នៅថ្នាក់មូលដ្ឋាន ក្នុងការងាយស្រួលដល់មន្ត្រីបំពេញការងាររដ្ឋបាលនៅមូលដ្ឋាន ។  ក្នុងនោះឯកឧត្តមក៏បានគូសបញ្ជាក់ថា ការចូលទទួលតំណែងជាអភិបាលរងខេត្តនេះ គឺ ដើមី្បបន្តអនុវត្ត តួនាទីភារកិច្ច ជាយុទ្ធសាស្ត្រដ៏សំខាន់នៅក្នុងខេត្ត សំខាន់លើការថែរក្សាសន្តិសុខ ស្ថេរភាពនយោបាយ ស្ថេរភាព សង្គម សណ្តាប់ធ្នាប់សាធារណៈ និង ការអភិវឌ្ឍន៍ឲ្យមានការរីកចម្រើនលើគ្រប់វិស័យជាបន្តបន្ទាប់  ព្រមទាំងលើកផងដែរ អំពីបញ្ហាការយកចិត្តទុកដ្ឋាក់កែលម្អរក្នុងការផ្តល់សេវាសាធារណៈជូនប្រជាពលរដ្ឋ និង គ្រប់មន្ទីរ ស្ថាប័ន ថ្នាក់ដឹកនាំមន្ត្រីរាជការទាំងអស់ ត្រូវប្រកាន់នូវក្រមសីលធម៌ចំពោះប្រជាពលរដ្ឋ ដែលមទទួលសេវារដ្ឋ បាលតាមមន្ទីរ អង្គភាព ក្រុង ស្រុក ឃុំសង្កាត់ជាដើម ។ ឯកឧត្តមអនុរដ្ឋលេខាធិការ ក៏បានគូសបញ្ជាក់ឲ្យដឹងថា នៅក្នុងអំឡុងឆមាសទី២នេះ នៅតាមបណ្តាខេត្ត ក្រុង ស្រុក និងត្រូវបង្កើនការិយាល័យច្រកចេញចូលតែមួយ និង ការិយាល័យប្រជាជន ។ ម៉្យាងទៀតគ្រប់បណ្តាឃុំ សង្កាត់ ត្រូវធ្វើការពង្រឹងពីតួនាទី ភារកិច្ចរបស់ខ្លួន មិនធ្វើ អ្វីទៅតាមតែអំពើចិត្តរបស់ខ្លួនឡើយ ព្រមទាំងត្រួតពិនិត្យពីតួនាទីភារកិច្ចរបស់ស្មៀន ចំពោះការផ្តល់សេវាជូន ប្រជាពលរដ្ឋ ។ ឯកឧត្តមក៏បានបញ្ជាក់ផងដែរ អំពីការគ្រប់គ្រងបញ្ជីវត្តមានរបស់មន្ត្រីរាជការ នៅតាមមន្ទីរ អង្គ ភាព ក្រុង ស្រុក រួមទាំងការផ្លាស់ប្តូរ និង តែងតាំងដល់មន្ត្រីរាជការ ត្រូវឈរលើតម្លាភាព និង គណនីយភាព ។ ឯកឧត្តមក៏បាន​ផ្តាំផ្ញើ​ដល់​លោក​អភិបាលរងខេត្ត​ ត្រូវខិតខំរៀនសូត្រពីរៀមច្បង ព្រមទាំងធ្វើ​យ៉ាងណា​ត្រូវ​ខិតខំ​ប្រឹងប្រែង​ធ្វើការ​អភិវឌ្ឍន៍​ខេត្ត ឲ្យ​មានការ​រីកចម្រើន​បន្ថែ​ម​ទៀត ​ ​គឺ​យកចិត្តទុកដាក់​ដល់​សុខទុក្ខ​ប្រជាពលរដ្ឋ​ជា ​ចំបង ​ហើយក៏​ត្រូវ​ចេះ​សាមគ្គីភាព​ផ្ទៃក្នុងគណៈអភិបាល លើការដឹក នាំ គ្រប់​គ្រងបណ្តាមន្ទីរ ស្ថាប័ន​និង​អង្គភាព​ក្នុង​ខេត្ត​ឲ្យ​បាន​ល្អ​ និង បង្កើនការ ពង្រឹងនូវរបៀបរបបការងាររដ្ឋបាល នៅក្នុងស្ថាប័ន ព្រមទាំងមានការទំនាក់ទំនងឲ្យបានល្អជាមួយមន្ទីរ ស្ថាប័ន អង្គភាព លើការងារសន្តិសុខ សណ្តាប់ធ្នាប់ សុវត្ថិភាពដល់ភ្ញៀវទេសចរណ៍ និងប្រជាជន ដោយខេត្តសៀមរាបជាតំបន់គោលដៅ ភ្ញៀវទេសចរណ៍លើពិភពលោក ចូលមកទស្សនាកម្សាន្ត ៕ អត្ថបទ ម៉ី សុខារិទ្ធ ភ្នាក់ងារសៀមរាប

01 02 03 04 05 06 07 08 09 10 11 12 13 14 15 16 17 18