បញ្ហាដែលប្រជាពលរដ្ឋប្រមាណជា៣០០នាក់នៅស្រុកប្រាសាទបាគង រារាំងរថយន្តដឹកសម្រាម របស់ក្រុមហ៊ុន ហ្គាអ៊ីយ៉ា ភីអិលស៊ី


ខេត្តសៀមរាប ៖ នៅក្នុងក្រុងសៀមរាប រយៈពេល០៣ថ្ងៃចុងសប្តាហ៍កន្លងមកនេះ គំនរសម្រាមរង់ចាំការដឹកជញ្ជូនចេញទៅកាន់ទីលានចាក់សម្រាមត្រូវបានកកស្ទះពេញក្រុង ដោយសារតែមានប្រជាពលរដ្ឋប្រមាណជា៣០០នាក់ បិទផ្លូវច្រកចូល រារាំងមិនឲ្យរថយន្តដឹកសម្រាម របស់ក្រុមហ៊ុន ហ្គា.អ៊ី.យ៉ា ភីអិលស៊ី( GAEA Plc ) ចូលទៅកាន់ទីលានចាក់សម្រាម នោះទេ  ។ ប្រជាពលរដ្ឋទាំងនោះ មកពីភូមិអន្លង់ពីរ និងភូមិភ្នំដី នៃឃុំត្រពាំងធំ ស្រុកប្រាសាទបាគង ខេត្តសៀមរាប ហើយទីលានចាក់សម្រាមនោះ ស្ថិតនៅចន្លោះភូមិទាំង២នេះ ក្នុងទំហំផ្ទៃដីប្រមាណជិត ៣ ហិចតា ។

លោកស្រី ក្លែរ ប្រូម៉េ នាយិកាក្រុមហ៊ុនប្រមូលសម្រាម ហ្គា.អ៊ី.យ៉ា បានបកស្រាយអំពីការតវ៉ាបិទផ្លូវរថយន្តដឹកជញ្ជូនសម្រាមរបស់ ក្រុមហ៊ុនហ្កា.អ៊ី.យ៉ា ដោយបញ្ជាក់ថា ប្រជាពលរដ្ឋទាំងនោះ គឺជាអ្នករើសសម្រាមនៅទីនោះ យូរឆ្នាំមកហើយ ។  ពួកគាត់បានបិទផ្លូវចូលទៅកាន់ទីលានចាក់សម្រាមនោះ តាំងពីថ្ងៃទី២៩ ខែសីហា កន្លងទៅនេះ ​ដែល​ធ្វើ​ឲ្យ​ប៉ះពាល់​ដល់ការប្រមូល និងដឹកជញ្ជូនសម្រាមនៅក្នុងក្រុងសៀមរាប ។ លោកស្រីបញ្ជាក់ពីមូលហេតុដែលនាំឲ្យមានបញ្ហាបិទផ្លូវនេះ គឺដោយសារតែក្រុមហ៊ុន ហាមឃាត់ និង បញ្ឈប់ពួកគាត់មិនឲ្យរើសសម្រាមបន្តទៀត ។  លោកស្រី បានបញ្ជាក់បន្ថែមថា ក្រុមហ៊ុន ហ្កា.អ៊ី.យ៉ា បានធ្វើការវិនិយោគនៅក្នុងគម្រោង ដើម្បីអភិវឌ្ឍទីលានចាក់សម្រាមសុវត្ថិភាព ដែល​គោរព​ដល់បរិស្ថាន បទដ្ឋានសុខភាព សុវត្ថិភាព ដើម្បីជាគុណប្រយោជន៍ដល់សហគមន៍ ។ គម្រោង​របស់​ក្រុមហ៊ុន ត្រូវបានឆ្លងកាត់ការសិក្សាវាយតម្លៃ ពីផលប៉ះពាល់បរិស្ថាន និងសង្គម (EIA) ហើយ​អនុលោម​តាម​អនុសាសន៍​ណែនាំ​របស់អាជ្ញាធរគ្រប់លំដាប់ថ្នាក់ ។ នៅក្នុងគម្រោងនោះ ក៏មានការហាមឃាត់មិនឲ្យអ្នកដទៃចូលទីលានចាក់សំរាម គឺជា​គោលការណ៍​នៃ​បទដ្ឋាន​សុខភាព និង សុវត្ថិភាពនៅក្នុងទីលាន ។ លោក ស្រី បង្ហាញគោលការណ៍ដំណោះស្រាយរបស់ក្រុមហ៊ុន យ៉ាងដូច្នេះថា  កាលពីអំឡុងខែកក្កដា ឆ្នាំ២០១៦ ( ឆ្នាំមុន )   ក្រុមហ៊ុន​បាន​ជូន​ដំណឹង​ជាផ្លូវការ​ដល់​អ្នករើស​សម្រោម ​ដែល​កាលណោះមានគ្នាប្រមាណតែ ១០០នាក់  អំពីការហាមឃាត់ចូលទីលានដែលជាកម្មសិទ្ធិឯកជនរបស់ក្រុមហ៊ុន ហើយ​​​ក្រុមហ៊ុន​បានផ្ដល់​ឱកាសឲ្យពួកគាត់ចូលធ្វើការនៅក្នុងក្រុមហ៊ុន ដោយផ្តល់ប្រាក់ខែ ចាប់ពី១២០ទៅ១៦០ដុល្លារ​អាមេរិក នឹងក្រុមហ៊ុនទទួលបន្ទុកផ្ដល់អាហារហូបចុក ការស្នាក់ នៅ និងការធ្វើដំណើរ ទៀតផង ប៉ុន្តែគោលការណ៍នេះ ត្រូវបរាជ័យ រហូតដល់ពេលនេះ ។

លោក ភូ សំអាត អភិបាលស្រុកប្រាសាទបាគង បង្ហាញហេតុផលនេះ ក្រោយពេលដែលធ្វើសំណូមពរឲ្យ ក្រុមហ៊ុនហ្កា.អ៊ី.យ៉ា ចាក់បើកសោររបងនៅទៅតាំងចាក់សម្រាមមិនបានសម្រេច  ក៏ត្រូវបានអាជ្ញាធរខេត្ត សុំឲ្យ កម្លាំងសមត្ថកិច្ច អាជ្ញាធរស្រុក​ និង ប្រជាពលរដ្ឋ ធ្វើការវាយសោរបើកឲ្យប្រជាពរដ្ឋចូលរើសកាកសំណល់នៅក្នុង គំនរសម្រាម ហើយប្រជាពលរដ្ឋក៏ត្រូវតែបើកផ្លូវឡើងវិញ ឲ្យរថយន្តដឹកជញ្ជូនសម្រាមរបស់ក្រុមហ៊ុនចូលចាក់ ដើមី្ប កុំឲ្យខុសពីអាជ្ញាធរ និង ប្រជាពលរដ្ឋ ហើយបើសម្រាមក្នុងក្រុងមានការកកស្ទះ គ្មានរថយន្តដឹកជញ្ជូន នោះគឺជាបញ្ហា របស់ក្រុមហ៊ុន ។  លោកបានបន្តទៀតថា កន្លងមកក្រុមហ៊ុន ក៏បានធ្វើការផ្សព្វផ្សាយដល់ពួកគាត់ផងដែរ ដោយឲ្យ បងប្អូនអ្នករើសសម្រាមទីនេះ ឲ្យមានការងារធ្វើក្នុងការងារប្រមូលសម្រាម  តែបងប្អូនប្រជាពលរដ្ឋលើកឡើងថា កាលណាពួកគាត់ទទួលប្រាក់ខែពីគេ ត្រូវបំពេញការងារឲ្យគេពេញម៉ោង  ដែលធ្វើឲ្យប៉ះពាល់នូវផលមុខរបរពួកគាត់ នៅតាមផ្ទះ សំខាន់ការងារបង្កបង្កើនផល និង ការចិញ្ចឹមសត្វ ។ ម៉្យាងទៀតការរើសសម្រាមនេះ ជាការងាររួមផ្សំ ក្រៅ ពីការងារបង្កបង្កើនផល ហើយគោលការណ៍របស់ពួកគាត់ គឺពេលទំនេរទៅរើស ដែលធ្វើឲ្យពួកគាត់មិនអាចទទួល បានទៅតាមគោលការណ៍របស់ក្រុមហ៊ុនឡើយ ។

តាមការបញ្ជាក់របស់តំណាងក្រុមប្រជាពលរដ្ឋអ្នករើសសម្រាម ដែលបិទផ្លូវរារាំងការដឹកជញ្ជូនសម្រាមនោះ បានបង្ហាញអំពីការទាមទារបស់ខ្លួន ដោយបានលើកពីមូលហេតុមួយចំនួន គឺមិនអាចទទួលយកនូវគោលការណ៍ របស់ក្រុមហ៊ុនហ្កា.អ៊ី.យ៉ា ពីព្រោះការងាររើសសម្រាមនេះ ជាការងារបន្ទាប់បន្សំរបស់ពួកគាត់ក្រៅពីការងារបង្កបង្កើន ផល ការងារផ្ទះរបស់ពួកគាត់ ។  ចំពោះបញ្ហាពីផលប៉ះពាល់សុខភាព និង គ្រោះថ្នាក់ផ្សេងៗកើតឡើងនោះ ពួកគាត់ ជាអ្នកទទួលខុសត្រូវ ដោយមិនដាក់បន្ទុកទៅក្រុមហ៊ុនឡើយ ។

នៅរសៀលថ្ងៃដដែលនោះ តាមរយៈនៃការឆ្លើយឆ្លងតាមទូរស័ព្ទ ជាមួយលោក លី សំរិទ្ធ អភិបាលរងខេត្ត និងជាអ្នកនាំពាក្យរដ្ឋបាលខេត្តសៀមរាប បានបញ្ជាក់ដូចអ្វីដែលលោក ភូ សំអាត បានលើកឡើងពីខាងដើម ។ ក្នុងនោះ អ្នកនាំពាក្យរដ្ឋបាលខេត្តសៀមរាប សង្កត់ធ្ងន់ថា  ដំណោះស្រាយត្រូវបានថ្លឹងថ្លែងទម្ងន់នៃផលវិបាក  ទីក្រុងទេសចរ វប្បធម៌ប្រវត្តិសាស្រ្តនៃកម្ពុជា  មិនអាចផ្តល់ឲ្យបញ្ហាគំនរសម្រាម បំផ្លិចបំផ្លាញបរិស្ថាន អនាម័យ ជះឥទ្ធិពលមិនល្អដល់អារម្មណ៍ភ្ញៀវនោះបានឡើយ  ព្រោះថាក្នុង១ថ្ងៃ សម្រាមដែលត្រូវដឹកជញ្ជូនចេញពីក្រុងសៀមរាប ក្នុងបរិមាណប្រហែលជា ២៧០ តោន ។ លោកក៏បញ្ជាក់ថា បើទោះជាបញ្ហានេះនៅមានសេសសល់ សម្រាប់ការសម្របសម្រួលគ្នាបន្តទៀតក៏ដោយសិទ្ធិអ្នករើសសម្រាមត្រូវបានអនុវត្តដូចធម្មតាសិន  ដើម្បីបានក្រុមហ៊ុនហ្គា.អ៊ី.យ៉ា ប្រមូលដឹកជញ្ជូនសម្រាមសំអាតក្រុង ដឹកជញ្ជូនសម្រាមចេញពីទីក្រុង ធានាអនាម័យ បរិស្ថាន និង សោភ័ណភាពដូចមុន ៕ អត្ថបទ ម៉ី សុខារិទ្ធ ភា្នក់ងារខេត្តសៀមរាប

46 47 48 49 50 51 52 53