ខេត្តសៀមរាប ៖ គិតមកត្រឹមថ្ងៃព្រហស្បតិ៍ ១១រោច ខែមកសិរ ឆ្នាំរកា នព្វស័ក្ត ព.ស២៥៦១ ត្រូវនឹងថ្ងៃទី១៤ ខែធ្នូ គ.ស២០១៧នេះ អង្គរត្រូវបានដាក់បញ្ចូលជាសម្បត្តិបេតិកភណ្ឌពិភពលោកអស់រយ:ពេល២៥ឆ្នាំហើយ។ រយៈពេល២៥ឆ្នាំមកនេះ អង្គរត្រូវបានសង្គ្រោះឲ្យរួចផុតពីភាពគ្រោះថ្នាក់ផ្សេងៗ ហើយកិត្តិសព្ទអង្គរក៏បានខ្ចរខ្ចាយទៅកាន់ពិភពលោកគ្រប់ទិសទីទាំងអស់។
ជាមួយនឹងការខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលបានប្តេជ្ញាចិត្តយ៉ាងមុតមាំក្នុងការអភិរក្សបេតិកភណ្ឌ បច្ចុប្បន្ន អង្គរក្លាយជាគោលដៅទេសចរណ៍លេខ១នៅលើពិភពលោក និងភ្ញៀវទេសចរអន្តរជាតិរាប់លានអ្នកបានចាត់ទុកអង្គរជាគោលដៅទស្សនាក្នុងក្តីស្រមៃរបស់ខ្លួន។
ដើម្បីអបអរសាទរឱកាសដ៏ពិសេសនេះ អាជ្ញាធរជាតិអប្សរានឹងរៀបចំ ពិធីខួប២៥ឆ្នាំដែលអង្គរចូលជាសម្បត្តិបេតិកភណ្ឌពិភពលោក នាមុខប្រាសាទអង្គរវត្តចាប់ពីម៉ោង៤ល្ងាចរហូតដល់ម៉ោង៨យប់ ថ្ងៃទី១៤ ខែធ្នូ ឆ្នាំ២០១៧នេះ។
ពិធីនេះនឹងប្រារព្ធឡើងក្រោមអធិបតីភាព លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា ដោយមានការអញ្ជើញចូលរួមពីសំណាក់អ្នកជំនាញការជាន់ខ្ពស់នៃគណៈកម្មាធិការអាយស៊ីស៊ី-អង្គរ មន្ត្រីបុគ្គលិកនៃអាជ្ញាធរជាតិអប្សរា សហភាពសហព័ន្ធយុវជនកម្ពុជា និងស្ថាប័នពាក់ព័ន្ធជាច្រើនទៀត។
លោកជំទាវ ម៉ែន សំអន បានប្រសាសន៏ថា អស់រយៈពេល២៥ឆ្នាំមកនេះ អង្គរត្រូវបានសង្គ្រោះឲ្យរួចផុតពីភាពគ្រោះថ្នាក់ផ្សេងៗ ហើយកិត្តិសព្ទអង្គរក៏បានខ្ចរខ្ចាយទៅកាន់ពិភពលោកគ្រប់ទិសទីទាំងអស់។ ជាមួយនឹងការខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលបានប្តេជ្ញាចិត្តយ៉ាងមុតមាំក្នុងការអភិរក្សបេតិកភណ្ឌ បច្ចុប្បន្ន អង្គរក្លាយជាគោលដៅទេសចរណ៍លេខ១នៅលើពិភពលោក និងភ្ញៀវទេសចរអន្តរជាតិរាប់លានអ្នកបានចាត់ទុកអង្គរជាគោលដៅទស្សនាក្នុងក្តីស្រមៃរបស់ខ្លួន។ លោកជំទាវ ម៉ែន សំអន បានគូសបញ្ជាក់ថា ការប្រារព្ធពិធីនេះឡើងគឺដើម្បីរំឭកស្មារតីកូនខ្មែរគ្រប់រូបឲ្យចេះស្រឡាញ់ និងចូលរួមថែរក្សាបេតិកភណ្ឌ ជាពិសេសគឺសម្តែងនូវការដឹងគុណដ៏ជ្រាលជ្រៅដល់បុព្វបុរសខ្មែរ ដែលបានពលិកម្មដើម្បីបុព្វហេតុអារ្យធម៌ដ៏រុងរឿងរបស់ខ្មែរនាសម័យអតីតកាល និងការតស៊ូជាបន្តបន្ទាប់របស់ថ្នាក់ដឹកនាំប្រទេសក្នុងការជម្នះរាល់ឧបសគ្គទាំងឡាយ ការពារឲ្យបាននូវសម្បត្តិបេតិកភណ្ឌដ៏មានតម្លៃរបស់ជាតិ និងពិភពលោកទាំងមូល ។ កត្តាសំខាន់នោះ គឺជម្រុញឲ្យយុវជនយើង កាន់តែយល់ច្បាស់ពីសម្បត្តិបេតិកភណ្ឌជាតិ ដែលជាមរតកដូនតាខ្មែរយើងបានបន្សល់ទុក ជាមរតក ដ៏មានតម្លៃដ៏មហាសាលនៅលើពិភពលោក និង ដើមី្បឲ្យយុវជនខ្មែរយើង ចូលរួបថែរក្សា អភិរក្ស និង អភិវឌ្ឍន៍ ក្នុង ការទាក់ទាញដល់ភ្ញៀវទេសចរជាតិ អន្តរជាតិចូលមកទស្សនាទ្វេរឡើង ៕ អត្ថបទ ម៉ី សុខារិទ្ទ ភ្នាក់ងារព័ត៌មានសៀមរាប
