ខេត្តសៀមរាប ៖ មានប្រសាសន៍នៅឱកាសក្នុងពិធីប្រកាសតែងតាំងគណៈកម្មាធិការគណបក្សប្រជាជនសង្កាត់គោកចក ក្រុង សៀមរាប ខេត្តសៀមរាប កាលពីរសៀលថ្ងៃទី ១៧ ខែ មករា ឆ្នាំ២០១៨ម្សិលមិញនេះ ឯកឧត្តម លី សំរិទ្ធ ប្រធានក្រុម ការងារគណបក្សខេត្ត ចុះជួយសង្កាត់គោកចក បានធ្វើការគូស បញ្ជាក់ថា ការប្រកាសតែងតាំងលោក ទិត ឱរ៉ា ជា ប្រធានគណៈកម្មាធិការគណបក្សប្រជាជន និង ជាចៅសង្កាត់ គោកចក នាពេលនេះ គឺជាទំនុកទុកចិត្តរបស់គណ បក្សប្រជាជនកម្ពុជា ក៏ដូចជារាជរដ្ឋាភិបាលកម្ពុជា និង ប្រជាជន ក្នុងសង្កាត់គោកចកទាំងមូល ។ ឯកឧត្តមក៏បានគូស បញ្ជាក់ថា ក្រោយការរំលាយគណបក្សសង្គ្រោះជាតិ ដោយតុលា ការកំពូលមក អាជ្ញាធរនៅតាមឃុំសង្កាត់មួយចំនួន ត្រូវបានធ្វើការរៀបចំឡើងវិញ ហើយមួយចំនួនត្រូវបានរក្សាទុកជូនបងប្អូនសមាជិកគណបក្សសង្រ្គោះជាតិ ដែលបាន សុំមករួមរស់ជាមួយគណបក្សប្រជាជនកម្ពុជា ដែលជាមេឃុំ ចៅសង្កាត់ ។ ឯកឧត្តម លី សំរិទ្ធ ក៏បានលើកឡើងថា ការសម្រេចចិត្តជ្រើសរើសរបស់បងប្អូន គឺជាភាពយុត្តិធម៌បំផុត សម្រាប់បងប្អូន ក្នុងការគាំទ្រនូវកម្ម វិធីនយោបាយ និង លក្ខន្តិកៈគណបក្សប្រជាជនកម្ពុជា ដើមី្បរួមគ្នាធ្វើកិច្ចអភិវឌ្ឍន៍ជាតិ ឲ្យមានការ រីកចម្រើន ដូចបណ្តាប្រទេស ជឿនលឿនលើសកលលោក ។ ក្នុងនោះដែរឯកឧត្តម ក៏បានលើកឡើងពីគោលការណ៍ទាំង១១ខ របស់គណបក្សប្រជាជន ព្រមទាំងធ្វើការបញ្ជាក់នូវចំណុចមួយចំនួន នៃលក្ខន្តិកៈរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ដែលជាកុលបុត្រខ្មែរដ៏ឆ្នើម រួមទាំងវីរៈជនមួយចំនួន ក្នុងការស្វែងរកនូវសុខសន្តិភាពពេញលេញ ជូនជាតិមាតុភូមិ ក្រោមគោលនយោ បាយឈ្នះៗ និង ធ្វើឲ្យមានការអភិវឌ្ឍន៍រីកចម្រើនលើគ្រប់ វិស័យ តាំងពីទីប្រជុំជនទៅដល់ជនបទ ។ ក្នុងនោះដែរឯកឧត្តម លី សំរិទ្ធ ក៏បានផ្តាំផ្ញើដល់លោកប្រធានគណបក្សសង្កាត់ទើបតែងតាំងថ្មី និង បងប្អូនដែលបានមករួមរស់ជាមួយគណបក្សប្រជាជន ត្រូវរួមសហការគ្នាធ្វើការងារ ក្នុងការបម្រើផលប្រយោជន៍ ជូន ប្រជាជន នៃមហាគ្រួសារខ្មែរតែមួយ និង ត្រូវធ្វើការកៀងគរប្រមូលសមាជិកក្រុមបក្សរបស់ខ្លួន ឲ្យបានទៅបោះឆ្នោតគ្រប់ៗ នៅឆ្នាំ២០១៨នេះ ក្នុងការជ្រើសរើស សមាជិកព្រឹទ្ធសភា និង ជ្រើសរើសតំណាងរាស្ត្រអាណត្តិទី៦ខាង មុខ នេះ ។ ឯកឧត្តមបានបញ្ជាក់ជូនសមាជិកទាំងអស់ថា មានតែគណបក្សប្រជាជនកម្ពុជាទេ ដែលមិនដែលរត់ចោលប្រជាពលរដ្ឋ គឺតែងតែនៅរួមសុខរួមទុក្ខ ជាមួយប្រជាពលរដ្ឋ រឺឯគណបក្សផ្សេងមិនដែលធ្វើអ្វីសោះបានតែថា គឺតែងតែបង្កអសន្តិសុខ ញុះញង់បំពុលបរិយាកាសសង្គមហើយ គណបក្សសង្គ្រោះជាតិដែលតុលាការកំពូល បានធ្វើការរំលាយដោយសារមេបក្សរូបនេះ រងការចោទប្រកាន់ជាជនក្បត់ជាតិផងដែរ ។ ម៉្យាងទៀតទោះបីគណបក្សប្រឆាំង បានរំលាយក៏មែនពិត យើងជាមន្ត្រីក្រុមការងាររបស់គណបក្សប្រជាជនគ្រប់ជាន់ថ្នាក់ ក៏មិនត្រូវបណ្តែតបណ្តោយ លើការងារចុះជួយមូលដ្ឋានដោយមិនធ្វេសប្រហែសបានឡើយ គឺត្រូវធ្វើការពង្រឹង ពង្រីកនូវសមាជិកក្នុងមូលដ្ឋាន ព្រមទាំងបង្កើនការយកចិត្តចំពោះគ្រួសារក្រីក្រ ចាស់ជរាគ្មានទីពឹង ជនពិការ ស្ត្រីនិងកុមារ រួមទាំងការអភិវឌ្ឍន៍ លើ ហេដ្ឋារចនាសម្ព័ន្ធក្នុងសង្កាត់ផងដែរ ។ ឯកឧត្តម លី សំរឹទ្ធ ក៏បានអំពាវនាវដល់អាជ្ញាធរមូលដ្ឋានសង្កាត់គោកចក ត្រូវបន្តធ្វើអំពើល្អជាមួយពលរដ្ឋ ឲ្យបានកាន់តែបានល្អប្រសើរថែមទៀត ព្រមទាំងត្រូវផ្តល់សេវាសាធារណៈផ្សេងៗឲ្យបានឆាប់រហ័ស និង ផ្សព្វផ្សាយឲ្យបានទូលំទូលាយនូវសេវាមិនបង់ប្រាក់ដូចជា ការធ្វើសំបុត្រកំណើត , សំបុត្រអាពាហ៍ពិពាហ៍ អត្តសញ្ញាណបណ្ណ័ សៀវភៅគ្រួសារជាដើម ដើម្បីឲ្យប្រជាពលរដ្ឋបានដឹងយល់ជ្រួតជ្រាបជៀសវាងមានការថ្នាំងថ្នាក់ណាមួយ ។ ដូច្នេះអាជ្ញាធរឃុំ សង្កាត់ កើតឡើងពីការគាំទ្ររបស់ប្រជាជន ដើមី្បផលប្រយោជន៍ ជូនប្រជាជន មិនមែនធ្វើជាម្ចាស់ប្រជាជនឡើយ ៕ អត្ថបទ ម៉ី សុខារិទ្ធ ភ្នាក់ងារសារព័ត៌មានខេត្តសៀមរាប
