ខេត្តសៀមរាប ៖ នៅព្រឹកថ្ងៃទី១៨ ខែ សីហាឆ្នាំ២០១៦នេះ ឯកឧត្តមបណ្ឌិត ឃឹម ប៊ុនសុង អភិបាល នៃគណៈអភិបាលខេត្តសៀមរាប បានដឹកនាំគណៈប្រតិភូខេត្តអញ្ជើញចូលរួមក្នុងកិច្ចប្រជុំ លើវិស័យវិនិយោគ នៅទីក្រុងម៉ាកាវ នៃសាធារណរដ្ឋប្រជាមានិតចិន ដោយមានក្រុមធុរៈកិច្ចក្នុងខេត្តចូលរួមផងដែរ ។ក្នុងឱកាសជូនដំណើរគណៈប្រតិភូខេត្ត នៅអាកាសយានដ្ឋានអន្តរជាតិសៀមរាបក៏មានវត្តមានរបស់ឯកឧត្តម នូ ផល្លា ប្រធានក្រុមប្រឹក្សាខេត្ត ឯកឧត្តម លោកជំទាវ ជាគណៈអភិបាលខេត្ត ថ្នាក់ដឹកនាំមន្ទីរ អង្គភាព នាយក នាយករងទីចាត់ការ ចំណុះរដ្ឋបាលសាលាខេត្តផងដែរ ។ តាមការបញ្ជាក់របស់លោក សុខ ថុល នាយករងរដ្ឋបាលសាលាខេត្តសៀមរាបបានឲ្យដឹងថាក្នុងដំណើរ អញ្ជើញទៅកាន់ទីក្រុងម៉ាកាវ នៃសាធារណរដ្ឋប្រជាមានិតចិនរបស់គណៈប្រតិភូខេត្តសៀមរាបនាពេលនេះ ក្នុងការ ចូលរួមប្រជុំជាមួយក្រុមអ្នកវិនិយោគនៃទីក្រុងម៉ាកាវហើយក៏ជាការជម្រុញទាក់ទាញដល់អ្នក វិនិយោគចិនសំខាន់ អ្នកវិនិយោគនៃទីក្រុងម៉ាកាវ ដើមី្បធ្វើជាដៃគូជាមួយក្រុមធុរកិច្ចរបស់ខេត្តសៀមរាបក្នុងការលើកម្ពស់លើវិស័យ ពាណិជ្ជកម្ម និងទេសចរណ៍ឲ្យកាន់តែមានភាពរីកចម្រើនរវាងខេត្តសៀមរាប នៃព្រះរាជាណាចក្រកម្ពុជា និង ក្រុង ម៉ាកាវ នៃសាធារណរដ្ឋប្រជាមានិតចិន។លោកក៏បានឲ្យដឹងផងដែរថាទីក្រុងម៉ាវ និង ខេត្តសៀមរាប បានធ្វើការចងសម្ព័ន្ធមេត្រីភាពជាមួយគ្នា ដូច្នេះហើយទើបក្រុងខេត្តទាំងពីរធ្វើការជម្រុញ នៃកិច្ចទំនាក់ទំនង សហប្រតិបត្តិការ នឹងគ្នាឲ្យកាន់តែមានភាពរលូនទ្វេរឡើងសំខាន់លើការវិនិយោគវិស័យទេសចរណ៍ និង ពាណិជ្ជកម្ម រួមនឹងវិស័យផ្សេងៗទៀត ផង។ នៅវេលាម៉ោង ៨ និង ៤៥នាទី ឯកឧត្តម និងគណៈប្រតិភូ បានចាកចេញពីអាកាសយានដ្ឋានអន្តរជាតិសៀមរាបតាមជើងហោះហើរក្រុមហ៊ុនអាកាសចរណ៍ ហុងកុង ប្រកបដោយសុវត្ថិភាពផងដែរ៕ អត្ថបទលោក ម៉ី សុខារិទ្ធ
