ខេត្តសៀមរាប ៖ អង្គសន្និបាតបូកសរុបលទ្ធផលការងារប្រចាំឆ្នាំ២០១៦ និង លើកទិសដៅការងារឆ្នាំ២០១៧ របស់មន្ទីររៀបចំដែនដី នគរូបនីយកម្ម សំណង់ និង សុរិយោដីខេត្ត ដែលបានប្រព្រឹត្តទៅមួយថ្ងៃពេញ នៅសាលប្រជុំសាលាខេត្តសៀមរាប ។ ឆ្លងតាមការពិភាក្សាផ្លាស់ប្តូរយោបល់ និងចែករំលែកបទពិសោធន៍ របស់អង្គសន្និបាតលើប្រធានបទនីមួយៗ ក្រោមការវាយតម្លៃលទ្ធផលការងារពិតជាបានរកឃើញនូវចំណុចខ្លាំង និងចំណុចខ្វះខាត ដែលបានអនុវត្តក្នុងរយៈពេលកន្លងមក និងរកឃើញនូវដំណោះស្រាយ ក៏ដូចជាវិធានការល្អៗបន្ថែមទៀត ដើម្បីពុះពារជំនះនូវរាល់ការលំបាក និង បញ្ហាប្រឈមនានានៅពេលខាងមុខ។អង្គសន្និបាតនេះត្រូវបានធ្វើពិធីបិទ ក្រោមអធិបតីភាពឯកឧត្តមបណ្ឌិត ឃឹម ប៊ុនសុង អភិបាលនៃគណៈអភិបាល ខេត្ត និង ឯកឧត្តមបណ្ឌិត នូ ផល្លា ប្រធានក្រុមប្រឹក្សាខេត្តសៀមរាប កាលពីរសៀលថ្ងៃទី ០៧ ខែ កុម្ភះ ឆ្នាំ២០១៧ ។
មានប្រសាសន៍បិទអង្គសន្និបាតនាឱកាសនោះ ឯកឧត្តមបណ្ឌិត ឃឹម ប៊ុនសុង ក៏បានធ្វើការកោតសរសើរ ចំពោះថ្នាក់ដឹកនាំ មន្រ្តីរាជការគ្រប់លំដាប់ថ្នាក់របស់មន្ទីរ ដែលបានខិតខំប្រឹង ប្រែងតាមតួនាទី និងភារកិច្ចរបស់ខ្លួន ដើម្បីរួមចំណែកធ្វើឲ្យក្រសួង និងរដ្ឋបាលខេត្តសម្រេចបាននូវសមិទ្ធផលថ្មីៗ និងធំៗជាច្រើនថែមទៀត។ លទ្ធផលនៃកិច្ចការទាំងឡាយ ដែលមន្ទីរសម្រេចបាននេះ គឺអាស្រ័យដោយមានកិច្ចសហការ និងការឧបត្ថម្ភគាំទ្រពីក្រសួង-ស្ថាប័ន មន្ទីរ-អង្គភាព អាជ្ញាធរដែនដី ដៃគូរអភិវឌ្ឍន៍ និងសង្គមស៊ីវិល ក្នុងដំណើរការអភិវឌ្ឍប្រទេសជាតិ ឲ្យមានការរីកចម្រើនលើគ្រប់វិស័យ បើទោះបីជាត្រូវឆ្លងកាត់នូវការលំបាក និងបញ្ហាប្រឈមធំៗ។ រហូតមកដល់ពេលនេះមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានរួមចំណែកយ៉ាង ច្រើនក្នុងការបង្កើតនូវសមិទ្ធិផល ជាជោគជ័យរួមរបស់រដ្ឋបាលខេត្ត និងរាជរដ្ឋាភិបាល។ឯកឧត្តមបណ្ឌិត ឃឹម ប៊ុនសុង ក៏បានគាំទ្រផងដែរ ចំពោះលទ្ធផលដែលអង្គសន្និបាតរកឃើញ នូវអនុសាសន៍ដែលបានលើកឡើង ក៏ដូចជាវិធានការទាំងឡាយសម្រាប់ដោះស្រាយបញ្ហាប្រឈមនានាពាក់ព័ន្ធ និងការកសាងប្រព័ន្ធគ្រប់គ្រងរដ្ឋបាលដីធ្លី ការងាររៀបចំដែនដី និងនគរូបនីយកម្ម សំខាន់ការរៀបចំប្លង់គោលក្រុងសៀមរាប ការងារសំណង់ឲ្យបានរឹងមាំ មានតម្លាភាព មានចីរភាព សមធម៌ និងប្រសិទ្ធិភាព។ ចំពោះបញ្ហាសំណូមពរ និងចំណុចដែលនៅសេសសល់ ក៏បានស្នើឲ្យក្រុមការងារធ្វើការកត់ត្រាទុកសម្រាប់ផ្នែកជំនាញពាក់ព័ន្ធ បន្តសិក្សាស្រាវជ្រាវ រកដំណោះស្រាយបន្តបន្ទាប់។ឆ្លៀតក្នុងឱកាសនេះ ឯកឧត្តម បណ្ឌិត ក៏បាននូវផ្តល់អនុសាសន៍មួយចំនួន និង បានសង្កត់ធ្ងន់ចំពោះបញ្ហាការគ្រប់គ្រងដីធ្លីរបស់រដ្ឋ នៅគ្រប់បណ្តា ក្រុង ស្រុកឲ្យបានត្រឹមត្រូវ សុក្រិតទៅតាមលិខិតបទដ្ឋាននៃច្បាប់ និង ត្រូវបញ្ចប់នូវប្រពៃណីការធ្វើប្លង់សំណង់លួច ដែលធ្វើឲ្យបាត់បង់នូវលិខិតបទដ្ឋានរចនាបទនៃសំណង់ជាលក្ខណៈខ្មែរ និង ការសាងសង់មុនច្បាប់អនុញ្ញាត ដោយសារតែលៀបសក្ការៈបន្តិបន្ទូចនោះ ដែលធ្វើឲ្យបាត់បង់ផលប្រយោជន៍ជាតិ ។ ឯកឧត្តមបណ្ឌិតក៏បានធ្វើការណែនាំ និង ផ្តាំផ្ញើ ដល់មន្ត្រីនៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត និង អាជ្ញាធរក្រុង ស្រុកទាំងអស់
ត្រូវខិតខំចុះបញ្ជីដីជាលក្ខណៈប្រព័ន្ធ ដើម្បីកាត់បន្ថយទំនាស់នៃការកាន់កាប់ដីធ្លី និង ការធ្វើចរន្តទិន្នន័យសុរិយោដី ជៀស វាងការផ្ទេរដីក្រៅផ្លូវការ មិនស្របតាមគោលការណ៍ច្បាប់ ដើម្បីគ្រប់គ្រងឲ្យបានសុក្រឹត្យនូវទិន្នន័យក្បាលដី នៅក្នុងសៀវភៅ គោលបញ្ជីដីធ្លី និងខិតខំប្រមូលចំណូលថវិការដ្ឋតាមរយៈពន្ធ ប្រថាប់ត្រាលើការផ្ទេរកម្មសិទ្ធិដី។
ត្រូវពង្រឹកការអនុវត្តសារាចរណ៍០២ ស្តីពីការកាន់កាប់ដីរដ្ឋ ដោយខុសច្បាប់ និងសារាចរលេខ០៣ ស្តីពីការដោះស្រាយ សំណង់បណ្តោះអាសន្នលើដីរបស់រដ្ឋ ដែលត្រូវបានទន្ទ្រាន កាន់កាប់ដោយខុសច្បាប់ និង លើកកម្ពស់ការអនុវត្តអនុក្រឹត្យ ស្តីពីការគ្រប់គ្រងដីរដ្ឋ លើរាល់ប្រធានបទដែលទាក់ទងនឹងការគ្រប់គ្រង និងការប្រើប្រាស់ដីរដ្ឋ ឲ្យមានលក្ខណៈតម្លាភាព សមធម៌ និងប្រសិទ្ធិភាព សំដៅជម្រុញការចុះបញ្ជីដីរដ្ឋឲ្យបានច្បាស់លាស់។ទប់ស្កាត់ រាល់សំណង់ ដែលសាងសង់គ្មានលិខិតអនុញ្ញាត ឬជាសំណង់ខុសច្បាប់ឲ្យបានទាន់ពេលវេលាសំណង់ខុសបទដ្ឋានបច្ចេកទេស ការសាងសង់លើដីសាធារណៈរបស់រដ្ឋ និងត្រូវណែនាំដល់ម្ចាស់សំណង់ ដាក់ពាក្យសុំលិខិតអនុញ្ញាតសាងសង់។ត្រូវចុះពិនិត្យគ្រប់ពេលវេលា នៅការដ្ឋានសំណង់ ដែលដំណើរការសាងសង់ និងជួយណែនាំបច្ចេកទេសដល់ម្ចាស់សំណង់ ដើម្បីសង់ឲ្យបានត្រឹមត្រូវតាមលិខិតអនុញ្ញាតព្រមទាំងពង្រឹងជម្រុញលើការងារបម្រើសេវាសាធារណៈ ទាំងផ្នែកសាងសង់ និងផ្នែកដីធ្លីជូនប្រជាពលរដ្ឋ ។ មិនត្រូវទុកចោលនូវកិច្ចការដោះស្រាយ បញ្ហាវិវាទដីធ្លី ដែលកំពុងកើតឡើងនៅមូលដ្ឋាន រួមទាំងវិវាទ ដែលនៅសេសសល់នាពេលកន្លងមក ។ ជាពិសេសលេខាធិការដ្ឋានសុរិយោដីថ្នាក់ខេត្ត ត្រូវយកចិត្តទុកដាក់ និងជម្រុញ ដល់គណៈកម្មការសុរិយោដីថ្នាក់ស្រុក ឲ្យអនុវត្តការងារដោះស្រាយបញ្ហាវិវាទដីធ្លីនេះបានបញ្ចប់ និងស្របតាមគោលការណ៍ណែនាំនៃលេខាធិការដ្ឋាន ៕ អត្ថបទ ម៉ី សុខារិទ្ធ
