ខេត្តសៀមរាប ៖ សណ្ឋាគារ និង រមណីយដ្ឋានសុខា សៀមរាប លំដាប់ផ្កាយ៥ ត្រូវបានបើកសម្ពោធជាផ្លូវការ កាលពីព្រឹក ថ្ងៃទី ០២ ខែ តុលា ឆ្នាំ២០១៧ ក្រោមអធិបតីដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។
តាមរបាយការណ៍របស់តំណាងក្រុមហ៊ុនសណ្ឋាគារសុខាសៀមរាបបានឲ្យដឹងថា សណ្ឋាគារសុខាសៀមរាបនេះ មានបន្ទប់ចំនួន ១ពាន់២៣៦បន្ទប់ ដែលមានបុគ្គលិកបម្រើការងារចំនួន ៦២៨នាក់ និង មានភោជនីយដ្ឋាននៅក្នុងសណ្ឋាគារចំនួន២ ព្រមទាំងមានទីតាំងសេវាកម្មម៉ាស្សា និង ស៉្បា ២កន្លែង និង សាលសន្និសីទដ៏ធំមួយ ដែលផ្ទុកមនុស្សបាន ៣ពាន់នាក់ ហើយសំណង់អគារសាងសង់ទៅតាមរចនាបទខ្មែរទៀតផង ។
មានប្រសាសន៍សំណេះសំណាលនោះដែរ សម្តេចតេជោ ហ៊ុន សែន ក៏បានគូសបញ្ជាក់ថា នេះគឺជា សមទ្ធិផលថ្មីមួយនៅលើទឹកដីប្រវត្តិសាស្ត្រសៀមរាប ក្នុងការបម្រើវិស័យទេសចរណ៍ ក្រោមការអ្នកវិនិយោគទុន ក្នុងស្រុក ដើមី្បបំពេញនូវតម្រូវការចាំបាច់លើហេដ្ឋារចនាសម្ព័ន្ធវិស័យទេសចរណ៍ នៅខេត្តសៀមរាប ក្នុងការបម្រើ សេវាកម្មដល់ភ្ញៀវទេសចរ ដែលបានចូលមកទស្សនាកម្សាន្ត។ សម្តេចក៏បានលើកផងដែរថា វិស័យទេសចរ គឺជាសរសៃឈាមសេដ្ឋកិច្ចរបស់ជាតិដ៏សំខាន់ ដែលជាប្រភពចំណូលមិនចេះរីងស្ងួតរបស់ជាតិ និង បានធ្វើឲ្យជីវភាពរស់នៅរបស់ប្រជាពលរដ្ឋមានភាពប្រសើរឡើង ។ សម្តេចក៏បានគូសបញ្ជាក់ទៀតថា វិស័យទេចរណ៍នេះ បានផ្តល់ ឱកាសដល់ប្រជាកសិករ ក្នុងការទាញយកចំណូលផ្គត់ផ្គង់ក្រុមគ្រួសារ តាមរយៈលើការផលិតបន្លែបង្ការ និង ចិញ្ចឹមសត្វ ក្នុងការផ្គត់ផ្គង់នៅតាមទីផ្សារ សណ្ឋាគារ ភោជនីយដ្ឋានជាដើម និង ផលិតផលសិប្បកម្ម ដែលកើតឡើងពីស្នាដៃរបស់ កូនខ្មែរ ក្នុងការបម្រើវិស័យទេសចរណ៍ ។ សម្តេចតេជោ ហ៊ុន សែន ក៏បានថ្លែងដែរថា តាមរយៈចំនួនអ្នកទេសចរណ៍នេះ គឺបានរួមចំណែកខ្លាំងដល់ការកាត់បន្ថយភាពក្រីក្ររបស់ប្រជាពលរដ្ឋ ព្រោះថា អ្នកទេសចរណ៍បានហូបចុកច្រើន ដែលជាការផ្តល់ចំណែកទីផ្សារដ៏ធំសម្រាប់កសិផលរបស់ខ្មែរ ។ សម្ដេចក៏បាន អំពាវនាវ ចំពោះការផ្គត់ផ្គង់កសិផលទៅតាមទីផ្សារ សណ្ឋាគារ ភោជនីយដ្ឋាន និងតាមកន្លែងទេសចរណ៍គឺជាចរន្តផ្គត់ផ្គង់កសិផលនៅនឹងកន្លែង ។ សម្តេចតេជោ ឲ្យបំផុសកសិករធ្វើការដាំដុះ និងជម្រុញការនាំចូលទៅតាមសណ្ឋាគារ ភោជនីយដ្ឋាដើម្បីផ្គត់ផ្គង់ដល់ភ្ញៀវទេសចរណ៍ និង សុំឲ្យប្រជាពលរដ្ឋបញ្ឈប់ការទិញបន្លែបង្កាមានជាតិគីមីដើម្បីបញ្ចប់ការនាំចូលបន្លែបង្កាមានជាតិគីមី ហើយមុននឹងទិញត្រូវពិនិត្យឲ្យបានច្បាស់ ។ សម្តេចតេជោ ហ៊ុន សែន ក៏បានអំពាវនាវឲ្យបង្កើនសុវត្ថិភាពចំណីអាហារ ដោយមិនត្រូវបណ្តោយឲ្យភ្ញៀវបរិភោគចំណីអាហារគ្មានសុវត្ថិភាពនោះទេ ។ សម្តេចនាយករដ្ឋមន្ត្រី ក៏បានផ្ដាំដល់អ្នកបម្រើសេវាទេសចរ និង ភាគីពាក់ព័ន្ធទាំងអស់ ត្រូវរួមគ្នាធ្វើយ៉ាងណាទាក់ទាញទឹកចិត្តភ្ញៀវទេសចរណ៍ ដោយឲ្យពួកគេមកលេងហើយចង់ត្រឡប់មកលេងម្តងទៀត និង ថែមទាំងនាំក្រុមគ្រួសារ ឬញ្ញាតមិត្តរបស់ពួកគេមកជាមួយ ដោយមិនត្រូវឲ្យគេមកហើយលែងចង់មកទៀតនោះទេ ។ ម៉្យាងទៀតវិធីដែលល្អជាងគេនៅក្នុងការឃោសនា គឺទេសចរមកម្នាក់ឲ្យគេត្រឡប់មកវិញ ហើយដោយនាំមកជាមួយនូវក្រុមគ្រួសាររបស់ពួកគេ និងមិត្តភក្ដិរបស់គេនេះ គឺជាចំណុចដ៏សំខាន់ កុំឲ្យគេត្រឡប់ទៅវិញ ហើយថា កុំទៅស្រុកខ្មែរ ពិបាកណាស់ វេទនាណាស់នោះទេ នៅពេលគេមកហើយ គេត្រឡប់ទៅវិញ គេប្រាប់ថាគួរទៅមើលអង្គរ ឬ ទៅតំបន់ផ្សេងៗនៅក្នុងប្រទេសកម្ពុជា ។ ក្នុងនោះដែរសម្តេចក៏បានសង្កត់ធ្ងន់ ឲ្យអាជ្ញាធរដែនដី ត្រូវយកចិត្តទុកដាក់បន្ត ធានាឲ្យបាននូវសន្តិសុខ និង សន្តិភាព ដោយខេត្តសៀមរាបជាគោលដៅ នៃភ្ញៀវទេសចរណ៍លើពិភពលោក ចូលមកទស្សនាកម្សាន្ត ។ តែបើយើងគ្មានសន្តិសុខ ឬមានការវាយប្រហារដោយភេរវកម្មណាមួយកើតឡើង វិស័យទេសចរណ៍នឹងរងផលប៉ះពាល់ផងដែរ ។ ដូច្នេះការយកចិត្តទុកដាក់លើសន្តិសុខ និងសណ្តាប់ធ្នាប់ គឺជាកត្តាសំខាន់សម្រាប់ទាក់ទាញអ្នកទេសចរ ហើយក៏គ្មានការអភិវឌ្ឍន៍ណាមួយធ្វើឡើងក្រោមគ្រាប់បែក គ្រាប់កាំភ្លើងនោះទេ ។ សម្តេចបានបន្ថែមថា ទន្ទឹមបញ្ហាសន្តិសុខដែលជា បញ្ហាធំ ក៏ត្រូវផ្តល់សុវត្ថិភាពដល់ប្រជាពលរដ្ឋ និង អ្នកទេសចរណ៍ហើយតំបន់ទេសចរណ៍ កុំឲ្យមានបងតូច បងធំ មានគ្រឿងញៀន និង ចោរឆក់ជាដើម ។ សម្តេចតេជោក៏បានជម្រុញឲ្យ មានការយកចិត្តទុកដាក់ក្នុងការផ្ដល់ទិដ្ឋការដល់ភ្ញៀវទេសចរ និង បានអំពាវនាវដល់អ្នកពាក់ព័ន្ធទាំងអស់នៅតាមអាកាសយានដ្ឋានរបស់កម្ពុជា ត្រូវសម្រួល ដល់ការផ្តល់ទិដ្ឋាការឲ្យជនបរទេសធ្វើយ៉ាងណាឲ្យពួកគេមានភាពងាយស្រួលផងដែរ ៕ អត្ថបទ ម៉ី សុខារិទ្ធ ភ្នាក់ងារសៀមរាប
