ខេត្តសៀមរាប ៖ នាព្រឹកថ្ងៃព្រហស្បត្តិ៍ ៥កើត ខែមិគសិរ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី ២៣ ខែ វិច្ឆិកា ឆ្នាំ២០១៧នេះ នៅសាលាក្រុងសៀមរាប មានប្រារព្ធធ្វើវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តសៀមរាប អាណត្តិទី២ ឆ្នាំ២០១៧ ក្រោមអធិបតីភាពឯកឧត្តមបណ្ឌិត នូ ផល្លា ប្រធានក្រុមប្រឹក្សាខេត្ត លោក លី សំរិទ្ធ អភិបាលរងនៃគណៈអភិបាលខេត្ត និង ឯកឧត្តម ហង្ស ពៅ អគ្គនាយករងអាជ្ញាធរជាតិអប្សរា ដោយមានការនិមន្ត អញ្ជើញចូលរួមពីព្រះសង្ឃ សមាជិក សមាជិកាក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាព តំណាងអង្គការសង្គមស៊ីវិល មាតាបិតាសិស្ស សិស្សានុសិស្ស អាជ្ញាធរ និង ប្រជាពលរដ្ឋមកពីស្រុកប្រាសាទបាគង ស្រុកអង្គរធំ និងក្រុងសៀមរាប មានចំនួន ៧៦០នាក់ ស្រី២០២នាក់ ។
វេទិកានេះមានគោលបំណង ដើមី្បផ្តល់ឱកាសជូនដល់បងប្អូនប្រជាពលរដ្ឋ អ្នកពាក់ព័ន្ធទាំងអស់ ដែលបាន មកពីស្រុកទាំងបី បានស្វែងយល់ពីស្ថានភាពទូទៅ នៃការអភិវឌ្ឍខេត្ត ក្រុង ស្រុក ឃុំ សង្កាត់ និង បញ្ហាប្រឈម ដែលកើតកន្លងមក ហើយវេទិកានេះ នឹងផ្តល់ឱកាស ក្នុងការបញ្ចេញមតិយោបល់របស់ខ្លួនពាក់ព័ន្ធនឹងកង្វល់ សំណូមពរ តម្រូវការជាក់ស្តែងក្នុងមូលដ្ឋាន ។
មានប្រសាសន៍បើកអង្គវេទិកានោះឯកឧត្តមបណ្ឌិត នូ ផល្លា ប្រធានក្រុមប្រឹក្សាខេត្ត បានគូបញ្ជាក់ នូវគោលបំណងសំខាន់ៗ ក្នុងការផ្តល់ព័ត៌មាន ជូនប្រជាពលរដ្ឋអំពីសមិទ្ធល ដែលក្រុមប្រឹក្សាសម្រេចបានកន្លងមក បញ្ហាប្រឈម និង អំពីបញ្ហាអាទិភាពនៃការអភិវឌ្ឍរបស់ក្រុមប្រឹក្សាសម្រាប់ឆ្នាំបន្ទាប់ និង ផ្តល់ឱកាសជូនប្រជាពលរដ្ឋ ក្នុងការផ្តល់យោបល់ ការពិភាក្សាលើខ្លឹមសារ និង របាយការណ៍ ព្រមទាំងទទួលយកនូវអនុសាសន៍ សំណូមពររបស់ ប្រជាពលរដ្ឋ ដើមី្បពិនិត្យ ពិភាក្សាដោះស្រាយ និង ជម្រុញឲ្យមានការចូលរួម និង បង្កើនភាពសិ្នទ្ធ ស្នាលរវាងអ្នកផ្តល់សេវាសាធារណៈ ឲ្យកាន់តែមានភាពល្អប្រសើរឡើង ។
ក្នុងអង្គវេទិកានេះ សមាជិកសមាជិកានៃអង្គវេទិកាបានលើកឡើងនូវ ពីការសុំផ្តល់ប័ណ្ណកម្មសិទ្ធិដីធ្លី , ហេដ្ឋារចនាសម្ព័ន្ធ ផ្លូវ ថ្នល់ , គ្រឿងញៀន , ការស្តារប្រឡាយចាស់ , បញ្ហាបរិស្ថានក្នុងក្រុង , អប់រំ , បញ្ហាអប្សរា បញ្ហាដីធ្លីនៅតំបន់បុរីសណ្ឋាគារទេសចរណ៍វប្បធម៌ , អត្រានុកូលដ្ឋាន , សណ្តាប់ធ្នាប់សាធារណៈ និង អគ្គិសនី ។
បន្ទាប់ពីការបកស្រាយបំភ្លឺរបស់បណ្តាមន្ទីរ អង្គភាពពាក់ព័ន្ធ ទៅនឹងរាល់១៨សំណួរ និង សំណូមពរ និង លាយល័កអក្សរ ៥៥ សំណួរ ដែលអង្គវេទិកាលើកឡើងរួចមក មានមតិបូកសរុបនិងបិទអង្គវេទិកានេះ ឯកឧត្តមបណ្ឌិត នូ ផល្លា ក៏បានគូសបញ្ជាក់ ថា អង្គវេទិកានេះ ជាសញ្ញាវិជ្ជមាន ថ្មីបន្ថែមទៀត ចំពោះកិច្ចខិតខំប្រឹងប្រែងក្នុង កិច្ចពិគ្រោះ យោបល់ ពិភាក្សា ដើម្បីពិនិត្យ ពិចារណា និង ធ្វើការឆ្លុះបញ្ចាំងទៅលើសមិទ្ធផលដែលសម្រេចបាន និង បញ្ហាប្រឈម ក្នុងឆ្នាំ២០១៧ និង គម្រោងសកម្មភាពជាអាទិភាពសម្រាប់ឆ្នាំ២០១៨ របស់រដ្ឋបាលខេត្ត និង ជាកម្លាំងចលករជម្រុញឲ្យការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិកាន់តែមានល្បឿន ទៅមុខឥតឈប់ឈរ ហើយក៏ជាកាយវិការដ៏ប្រពៃ សំដៅធ្វើឲ្យថ្នាលនៃលទ្ធិប្រជាធិបតេយ្យនៅកម្ពុជា កាន់តែចាក់ឬសយ៉ាងជ្រៅ នៅតាមសហគមមូលដ្ឋានរបស់យើង ហើយព្រឹត្តិការណ៏នាថ្ងៃនេះ វាក៏ជាយន្តការមួយ ក្នុងការពង្រឹងនីតិរដ្ឋ និង អភិបាលកិច្ចល្អនៅមូលដ្ឋាន ។ ឯកឧត្តមបណ្ឌិត នូ ផល្លា ក៏បានលើកផងដែរ ពីការកែសម្រួលសំបុត្រកំណើតដែលក្រសួងមហាផ្ទៃបានធ្វើការកំណែទម្រង់ ដោយបានផ្លាស់ប្តូរនីតិវិធី ក្នុងការកែតម្រូវពីស្ថាប័នតុលាការមកកែសម្រួលនៅក្រសួងមហាផ្ទៃវិញ ហើយការកែតម្រូវសំបុត្រកំណើតត្រូវបញ្ជាក់តាមរយៈឃុំ សង្កាត់ ក្រុង ស្រុក រាជធានី ។ ឯកឧត្តមបណ្ឌិតបានថ្លែងអំណរគុណយ៉ាងជ្រាលជ្រៅ ចំពោះវាគ្មិនតំណាងមន្ទីរ-អង្គភាពនានាជុំវិញខេត្ត ដែលបានធ្វើការបកស្រាយបំភ្លឺ ឆ្លើយតបទៅនឹងសំណួរ ទុក្ខកង្វល់របស់បងប្អូនប្រជាពលរដ្ឋ ។ អង្គវេទិកាសូមរក្សាសិទ្ធិរក្សាទុកសំណួរ និង កង្វល់ ដែលអង្គវេទិកានាពេលនេះ ពុំទាន់អាចបកស្រាយបំភ្លឺបាន ក្រុមប្រឹក្សាខេត្ត នឹងយកសំណួរ និង កង្វល់ទាំងនេះ ទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្តហើយនឹងធ្វើការឆ្លើយតប និង ជម្រាបជូនដំណឹងជាលាយលក្ខណ៏អក្សរ ដល់ម្ចាស់សំណួរ បងប្អូនប្រជាពលរដ្ឋ តាមកាលវេលាសមគួរ តាមរយៈ មេឃុំ-ចៅសង្កាត់ ក្រុមប្រឹក្សាឃុំ-សង្កាត់ តាមមូលដ្ឋានដែលបងប្អូនរស់នៅ ៕ អត្ថបទ ម៉ី សុខារិទ្ធ ភ្នាក់ងារព័ត៌មានខេត្តសៀមរាប
